រឿង​កំប្លែងៈ ថ្លៃ​ដើម​កើន

ដោយ តេង សំអាន


បុរសម្នាក់ជិះម៉ូតូទៅដល់តូបលក់ទឹកកកមួយ រួចប្រាប់ទៅអ្នកលក់ “ឲ្យទឹកកកខ្ញុំ ៣០០០រៀល​មក”។ អ្នកលក់ក៏អារទឹកកក លើកដាក់ ក្នុងស្បោង ហើយហុច​ឲ្យគាត់វិញ។
អ្នកទិញៈ ហ្អាក! ម៉េចក៏ដុំតូចយ៉ាងនេះ។ ខ្ញុំទិញលើកមុន ធំសឹងយួរមិនចង់រួច។
អ្នកលក់ៈ ពេលនេះជាពេលចូលឆ្នាំ... លក់ដាច់ស្ទើររកទឹកកកលក់មិនបានផង។
អ្នកទិញៈ ហ៊ឺ.... បើលក់ដាច់ទៅហើយ ហេតុអ្វីចាំបាច់ឡើងថ្លៃទៀត.... លក់ឲ្យតែ​បាន ច្រើនកាលណាមិនចំណេញច្រើនដូចតែគ្នាទេ?
អ្នកលក់ៈ មិនឡើងថ្លៃមិនបានទេ.... ថ្លៃដើមផលិតកើនឡើងណាលោក!
អ្នកទិញៈ ខ្ញុំគិតថា គ្មានអីកើនឡើងទេ!
អ្នកលក់ៈ លោកមិនយល់ទេ... ទឹកកកធម្មតាត្រូវការរយៈពេលមួយកំណត់ដើម្បីឲ្យវា កក​ ... សមត្ថភាព​រោងចក្រមានកំណត់ ម្ល៉ោះហើយមិនបានផលិតឲ្យលើស​ ត្រៀមបំរុងទុក​ទេ។
អ្នកទិញៈ សមហេតុផលដែរ។ ចុះហេតុអ្វីក៏ថ្លៃកើន?
អ្នកលក់ៈ ដើម្បីផលិតឲ្យបានទាន់ពេល និង គ្រប់តំរូវការ រោងចក្រត្រូវបន្ថយរយៈពេល​ បង្កក... ការបន្ថយនេះហើយធ្វើឲ្យវាឡើងថ្លៃ។
អ្នកទិញៈ តើគេត្រូវប្រើម៉ាស៊ីន បច្ចេកទេសទំនើប ឬ មនុស្សបន្ថែមឬ?
អ្នកលក់ៈ អត់ទេ... គ្រាន់តែបន្ថែមធាតុផ្សំប៉ុណ្ណោះ... គឺគេត្រូវចាក់ជីអ៊ុយរ៉េ បន្ថែម ទើប​ ធ្វើឲ្យវា​ ឆាប់កក បាន។ ម្យ៉ាងទៀត សព្វថ្ងៃ ជីអ៊ុយរ៉េ ក៏ឡើងថ្លៃដែរ។
អ្នកទិញៈ អូហ៍... ទឹកកកក៏ត្រូវការជីដែរឬ?????